Perigo wa magmahay

Wala magmahay ang gipalagpot nga hepe sa kapolisan sa dakbayan sa Talisay sa pag-relibo kaniya sa puwesto ug mipasalamat sa suporta sa Local Government Unit (LGU) sa maong siyudad ug ni Kongresista Eduardo Gullas sa unang distrito sa lalawigan sa Sugbu.

Si Supt. Romeo Perigo kanhi hepe sa Talisay Police station mitug-an nga sobra na sad ang tenure of office niini sa Talisay ug normal sa PNP ang pag-ilis og bag-ong hepe ug maisip kini nga kabahin usab sa paglambo sa iyang karera.

Nakigkita si Perigo kang Mayor Socrates Fernandez ug mipasabot sa rason sa iyang pagbiya.

Miangkon hinuon kining dihay mga sitwasyon nga lisod kaayong sulbaron ang mga panghitabo sa dakbayan ilabi na niadtong nalambigit ang anak sa mayor nga si Joavan Fernandez sa mga kontrobersya.

Gipasigarbo ni Perigo nga sa iyang termino duna siyay accomplishment tungod kay nahimo silang numero uno kung ang crime solution efficiency ang hisgutan.

Matud niya nga nius-os ang crime volume sukad pa niadtong tuig 2006 hangtud sa 2008 gikan sa bulan sa Enero hangtud sa bulan sa Agosto.

Gani niingon siya sa wala pa siya mobiya sa Talisay Police iyang gipanghatagan og kopya sa crime solution efficiency ang tanang opisyal aron mahibaw unsay dagan sa peace and order sa dakbayan.

Mipasalamat usab si Perigo kang Kongresista Eduardo Gullas sa gihatag niini nga mga sakyanan, gasoline ug upat ka computers alang sa police station ingon man pundong P1 milyon alang sa pagpanindot sa ilang buhatan.