CEBU - Usa ka tawo ang gitiyan pagpusil sa duha ka mga batan-ong lalake nga iyang gikasugat kagahapon sa kaadlawon diha sa F. Llamas barangay Basak San Nicolas ning dakbayan.
Ang biktima giila sa kapulisan nga si Gary Elimino, 24, ulitawo, nga taga sitio Dap-dap, barangay Mambaling, ning dakbayan .
Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office, nasayran nga ang biktima gikatahong gikan kini sa iyang mga amigo nga nag-inom sa usa sa mga tindahan sa ilang lugar.
Padulong na unta ang biktima nga mopauli dihang gikasugat niini ang duha ka mga wala hiilhing batan-on ug sa kalit gipusil siya sa armas nga wala pa hisayri ang kalibre ug nasabak siya sa tiyan.
Gikarga dayon ang biktima sa sakyanan sa kapulisan ug gihatod ngadto sa Cebu City Medical Center.
Wala pa matumbok sa kapulisan ang motibo sa pagpamusil samtang gipangita pa karon ang mga kriminal. (BANAT)