CEBU - Usa ka tigulang lalaki nga mag-uuma ang gipusil-patay sa wala mailhing mamumuno samtang naglakaw paingon sa ilang balay ug nagguyod sa iyang kabaw.
Nahitabo kini sa miaging gabii diha sa bukirang barangay sa Malolos sa lungsod sa Barili.
Si PO3 Job Sarvida sa Barili Police Station nga nahinabi sa Banat News miila sa biktima nga mao si Candido Umayam, 54, biyudo, usa ka mag-uuma ug residente sa naasoy'ng lugar.
Matud ni PO3 Sarvida nga niadtong higayona pasado alas 7 sa gabii gikan sa iyang umahan ang biktima ug naguyod sa iyang kabaw paingon na mopauli sa ilang pinuy-anan
Apan giingong giatngan nang daan sa wala mailhing mamumuno ug gipusil sa makadaghang higayon gamit ang wala matinong kalibre sa armas.
Mga silingan nga nakadungog og buto-buto sa armas daling misusi sa dapit apan mao nalang ilang nakit-an ang biktima nga nabulit sa kaugalingon dugo ug may mga samad pinusilan.
Ang biktima nakaangkon og samad sa tiyan, walang siko ug walang bahin sa lawas kinsa daling gidala sa mga silingan sa Barili District Hospital apan pipila palang gani ka minutos gikan sa pag-abot nakabsan gyud sa iyang kinabuhi ang biktima. (BANAT)