Migamit sad og 'koskos' - Natuel

CEBU - Gawas sa dinamita, gigamitan pa gyud og “koskos” kon cyanide ang pagpanguha sa isda sa lima ka mga tawo sa wala pa mahugno ang bato sa dagat nga mipatay sa usa kanila diha sa sitio Sagporon barangay Subabasbas dakbayan sa Lapulapu.

 Kini ang pamahayag ni Lapulapu City Office OIC Director Mariano Natuel Jr. sa pakighinabi sa Banat News base sa ilang gihimong pakisusi diha sa maong lugar.

 Matud pa ni Natuel gawas sa paggamit og dinamita sa pagkuha sa isda nagduda silang nigamit pa gyud og koskos ang lima hinungdan sa kadaghan sa mga isda nga nangamatay sa maong dapit.

Atol sa pagkahitabo namatay si Apolonio Andales human kini madat-ugi og dakong boulder nga nasiak gumikan sa pagkatay-og sa dagat nga gikatahong bunga sa pagpabuto og dinamita sa kauban niini.

 Padayon pa ang imbestigasyon nga himuon ni SPO2 Rolito Jumao-as ug ang pagpatawag sa upat nga kauban ni Andales alang sa pagtino kung kinsa kanila ang naglabay og dinamita ug ang nagbutang og koskos.

Wala pa matino kung pasakaan ba og kaso ang mga kaubanan ni Andales sanglit wala pay mibarog nga testigos aron magtumbok kung si kinsa kanila ang milabay sa dinamita.

 Matud pa ni Natuel nga hangtud ning panahona wala gyud silay mahimo sa paggukod sa mga illegal nga mananagat gumikan sa ilang kakuwang sa mga sakyanan sa dagat.