CEBU - Mga kaso sa sunod-sunod nga pagpamusil maoy gitutokan karon sa kapolisan sa dakbayan sa Talisay matud ni Senior Inspector Jovito Canlapan, officer in charge sa Talisay City Police Station.
Kini human sa mga nagsunodsunod nga tulis sa maong dakbayan sa miaging buwan.
Ang duha ka nagsunod-sunod nga pamusil sa miaging semana nahitabo didto sa barangay Maghaway ug usa usab sa barangay Lawaan III nga hangtod karon nagpabiling wala masulbad kay walay nakaila sa mga kriminal.
Sa Maghaway sila si Ricardo Ricafort ug Eric Bongad Amad maoy mga biktima, samtang sa Lawaan III mao si Noel Alcover.
Sila si Ricafort ug Amad ang gipamusil sa nag-bonnet nga mga tawo, samtang si Alcover ang gikatahong adunay kalambigitan sa fraternity war ang hinungdan sa pagkaluthang niya.
Matud pa sa kapolisan nga padayon pa nilang giimbistigar ang maong mga panghitabo apan wala pa silay nakuhang mga saksi nga makatumbok sa mga tawong namusil.
Sa miaging buwan ang pagpanulis nga gihimo sa mga tawong nagsakay og motorsiklo maoy misiaw sa Talisay samtang niining mga buwana, pinusilay na usab maoy naghatag og labad sa ulo sa mga kapolisan sa maong dakbayan. (BANAT)