Seedling ipakita ni Cuenco

CEBU - Mipadayag og kaandam si Cebu City Agriculturist Joelito Baclayon sa pagtabang kang kongresista Antonio Cuenco sa pagpangita sa mga seedlings kon mga liso o lubangon nga gipang-apod-apod na ngadto sa kabarangayan.

Ang seedling distribution maoy kabahin sa P15 milyones nga Agri-project ni Cuenco nga gipatuman ni Guadalupe barangay captain Jingjing Faelnar.

Apan nagduda ang kongresista kung diin paingon ang nahisgutang mga igtatanom nga mga prutas nga mokantidad og minilyon ka pesos.

Kini tungod kay matud ni Cuenco, kung kini tinuoray pa nga gipang-apod-apod ngadto sa kabarangayan, namunga na unta kini niining higayona.

Gipamatud-an hinoon ni Baclayon nga dunay mga barangay sa siyudad nga gipanghatagan sa nahisgutang mga seedlings ug miingon siya nga kung mangayo ang kongresista sa iyang record, kini dili niya hikawan.

Si Faelnar daan nang mibahad nga dili siya mabalaka sa imbistigasyon kay aduna siyay record sa mga lugar nga iyang gipanghatagan sa mga liso, apan bahin sa pangutana kun kini nanurok ug namunga ba, maoy butang nga kuwestiyonable. (BANAT)