Ex-NPA nitahan

CEBU - Usa ka lalaki nga gidudahang mass supporter sa New Peoples Army (NPA) ang nisurender sa mga sakop sa 78th IB nga nagbase sa mid-north area sa probinsya sa Sugbu.

Si Lt. General Pedro Ike Inserto, commander sa Central Command ni-presentar ni Rodulfo Quimbo, alyas ka Rudy, 52, taga sitio Panaliwad-on barangay Langosig dakbayan sa Danao ngadto sa media.

Lakip sa gisurender ni Quimbo ngadto sa 78th IB nga gipangulohan ni Lt. Col. Raymundo Bañares ang usa ka Japanese Springfield (bolt action) Caliber 30 human makadungog sa “Pulong-pulong” sa militar sa ilang barangay kabahin sa “Balik Baril Program.”

Ang maong programa nipasalig og kwarta sa matag armas nga itahan ug livelihood assistance gikan sa provincial government.

Nakita ni Quimbo ang sinseridad sa militar ug gobiyerno human niya makita sa TV coverage ug nakabasa sa mga pamantalaan niadtong ningsurender sa ilang tag-as nga armas ang mga mass supporters.

Giingong ang armas gibilin kaniya sa usa ka ‘Ka Roy’ nga giila sa tinuod nga pangan nga Vicente Labador kanhi lider sa NPA nga nag-operate sa ilang barangay kinsa mao usab ang nag-recruit kaniya kuyog ang ilang silingan nga miyembro usab sa NPA.

Si Quimbo miangkong guide sa mga NPA kaniadto sa mga lugar sa lungsod sa Asturias, Tuburan, Danao City ug uban pa diha sa amihanang bahin sa lalawigan isip usa ka Unit Militia.

Naapil sa engkwentro si Quimbo niadtong 1988 tali sa mga sakop sa Philippine Constabulary (PC) kaniadto diha sa sitio Malinginlinao barangay Sibacan, Danao City nga miresulta sa pagkaangol sa usa nila ka kauban ug pagkamatay sa inosenteng sibilyan. – BANAT NEWS