Nadat-Ugan og Bato Namatay

CEBU - Maayong pagkapisat sa lawas sa usa ka 22-anyos nga lalaki human kini madat-ugi sa gibana-banang kapin napulo ka toneladas nga bato samtang kini diha sa ilawom niini kagahapon sa buntag ug hapon na naugkat.

Ang insidente nahitabo diha sa sitio Sagporon, barangay Subabasbas dakbayan sa Lapulapu ug giila ang biktima nga si Apolonio Aro Andales, 22, ulitawo (dunay kalive-in) residente sa Marigondon dakbayan sa Lapulapu ug usa ka truck boy sa usa ka retailer sa soft drinks.

Gikatahong ang iligal nga pagpangisda ginamit ang dinamita maoy nakaingon sa pagkasiak sa dakong bato ug adto mihagsa sa naghapa nga si Andales diha sa ilawom.

Sa pamahayag ni Winnie delos Santos ang kapuyo sa biktima kuyog sa biktima ang mga higala niining sila si Johnrey Aton, Iko Aton, Tatoy ug ang manghod niini nga si Alfred Andales nananghid nga manguha og para kilawon sa barangay Subabasbas.

Si SPO2 Rolito Jumao-as, imbestigador sa homicide section nagkanayon base sa pamahayag sa mga residente sa dapit nga nakadungog sila og kusog kaayong buto.

Nagduda ang kapolisan nga posibleng usa sa kauban ni Andales maoy nidagkot sa maong dinamita aron pagkuha og isda apan aksidenteng nabuak ang dakong bato tungod sa pag-uyog sa dagat ug nasiak ang bato.

Ang nakalingkawas nga si Aton sa iyang pagdagan naabtan ang iyang ulo ug buko-buko sa bato apan si Andales nadat-ugan, bugtong mga kamot ug tiil nalay makit-an kaniya diha sa ilawom.

 Ang caretaker sa maong dapit nga si Cayetano Espinosa, 84, nga gihinabi sa Banat News nagkanayon nga 46 na ka tuig na siyang nagbantay sa maong dapit nga gipanag-iya ni Dr. Suga Sotto Yuvienco diin mahitabo ang insidente.

Matud pa ni Espinosa duna siya’y nakitang tulo ka tawo ibabaw sa maong bato ug diha-diha nakadungog siya og sipang buto, nasundan kini dayon sa pagkasiak sa bato ug nanglayat ang nanungtong ngadto sa dagat, dangtan pila ka gutlo usa ka tawo ang iyang nakit-ang nagdagan nga nagkadugo.

 Gumikan kay dako ug bug-at ang bato nakadesider sila si SPO2 Jumao-as ug Suba Basbas Kapitan Gregoria Justiniane nga buk-on nalang ang bato pinaagi sa dinamita aron makuha ang patay’ng lawas ni Andales.

Makaduha ka higayon gibutangan ug gipabuthan og dinamita ang bato una pa kini nabuak ug inabagan sa power tools sa Emergency Rescue Unit Foundation naugkat gyud ang patay’ng lawas ni Andales alas 4:15 na sa hapon. – BANAT NEWS