Gipatay sa diskohan

CEBU -  Nadunggaban patay ang usa ka ulitawong guwang atol sa gipahigayong disco sa Sitio Panas, barangay Sta. Lucia lungsod sa Asturias niadtong Domingo sa alas 2:00 sa kaadlawon.

Ang biktima mao si Rodelio Sumilhig Tanjay, 34 , ulitawo nga taga barangay Antipolo, lungsod sa Tuburan.

Samtang ang mga suspetsado mao sila si Lyldie Jimenez, ug Donner Tagalog, pulos ulitawo nga tag 19 anyos pay edad nga taga barangay Antipolo, Tuburan.

Matod ni Toto Maglasang, barangay kagawad sa Antipolo nga sa wala pa ang hitabo nagbinugnoay ang biktima ug ang mga suspek ug human sa pipila ka gutlo nakit-an nalang nga mibay-ad na ang biktima sa yuta kansang dughan gipasampakan sa ice pick.

Ang kapulisan sa lungsod sa Tuburan daling mirespondi sa hitabo ug nasikop dayon ang mga suspek ug tungod kay ang lugar sa maong buno sakop man sa Asturias, gitunol lang usab dayon ang maong mga dinakpan ngadto sa kapolisan sa Asturias.

Ang biktima gisuwayan pa og hatod ngadto sa tambalanan apan gideklarar kining dead on arrival.

Matud ni SPO1 Vicente Mendaros sa Asturias Police padayon pa nilang gi-imbistigar ang maong kaso. (BANAT NEWS)