Estudyante igo sa saag nga bala

CEBU -  Usa ka armas de fuego nga giduwaan sa usa ka ulitawo ang mibuto ug misamad sa usa ka tinun-ang dalaga didto sa Sitio Saac, Brgy. Buaya, dakbayan sa Lapulapu sa milabay'ng Domingo sa gabii.

 Ang biktima mao si Rowena Dupal-ag Sabado, 20, dalaga ug nagtungha sa 4th year sa Bankal National High School sa dakbayan sa Lapulapu.

 Si PO3 Manolito Abellanosa sa Homicide Section sa Lapulapu City Police Station mibutyag sa Banat News nga niadtong Domingo sa gabii, si Sabado namiyesta sa iyang higalang si Anna (dili tinuod nga ngalan) sa Buaya, ug iyang nahimamat si Romnick Solano Jumao-as, 18, ulitawo nga taga Sitio Humayhumay, Brgy. Gun-ob dakbayan sa Lapulapu nga nagdala og armas nga kalibre 38.

 Sulod sa panimalay ni Anna, si Jumao-as nagduwaduwa sa iyang armas pinaagi sa pagkablit-kablit sa gatilyo niini, dihang sa kalit lang kining mibuto.

Si Sabado nga naglingkod sa sala naigo sa iyang walang pulso ug gidali kini paghatod ngadto sa Lapulapu District Hospital, samtang si Jumao-as misibat dayon human sa maong hitabo.

 Sa pagkakaron gipangita na sa kapolisan si Jumao-as samtang gipasaka na usab ang tukmang kaso batok kaniya. (BANAT NEWS)