1 sa 3 ka kanhi hepe mabalik sa MCPO

CEBU -  Adunay usa sa tulo ka mga kanhi opisyal sa Mandaue City Police Office (MCPO) kinsa nadestino na karon sa nagkalainlaing departamento sa kapolisan ang malagmit mahibalik diha sa dakbayan kun pilion kini ni Mayor Jonas Cortes nga ihulip kang Senior Superintendent Rodel Calungsod.

Taktakonon si Calungsod sa pagka hepe sa MCPO dihang iyang gipasanginlan ang mayor ug ang mga konsehal sa Mandaue nga maoy nagpataas   sa krimen   kay magpunay lang og pinahitay.

Gumikan sa kapungot nila Mayor Cortes ug bise Mayor Carlo Fortuna, gawas nga ginganlan og walay kabangkaagan si Calungsod ug ang mga sakop niini girekomendar pa gyud nga tangtangon sa iyang pagka hepe aron ilisan sa labing batid nga mga hepe.

Ang tulo ka mga opisyal kinsa kanhi hepe sa MCPO nga pilian aron ihulip kang Calungsod mao sila si Senior Superintendent Jesus Gaquing, Edgardo Ingking ug Alexander Abadinas.

Kining tulo pulos kwalipikado nga mamahimong hepe sa kapolisan sa MCPO matud pa ni Senior Superintendent Vicente Loot, hepe sa Personnel and Human Resources Development Division sa Police Regional Police Office 7.

Nasayran gikan kang Loot kining tulo kauban sa walo ka dagkong opisyal sa kapolisan kinsa papilian kang Mayor Cortes nga mahimong ihulip kang Calungsod.

Si Gaquing, Ingking ug Abadinas pulos nahimong hepe sa MCPO sa panahon pa ni kanhi Mayor Thadeo Ouano. 

Si Gaquing maoy kasamtangang hepe sa Regional Mobile Group 7, samtang si Ingking maoy kasamtangang director sa kapolisan sa Bohol ug si Abadinas, maoy hepe karon sa Community Relations Officer sa Police Regional Office-7. (BANAT NEWS)