'Anti-Life' Bill hayan mabasura

Nagkahayag na ang posibilidad nga mabasura ang kontrobersyal nga Reproductie Health Bill nga nag-ung-ong sa Ubos Balay Balauranan kung ang pasultihon mao ang country director sa Human Life International (HLI) nga si Rene Josef Bullecer.

Gihimong basehanan ni Bullecer niini mao ang giingong pag-atras na sa ubay-ubay nga mga kongresista pagpaluyo sa maong balaudnon.

Gikataho nga labing awahi nga nibawi sa ilang mga pirma mao sila si Western Samar representaties Reynaldo Uy ug Sharee Ann Tan.

Ang paningkamot sa simbahan ug ubang religious group pagpakigbatok sa Reproductie Health Bill maoy gitumbok ni Bullecer nga hinungdan niini.

Nagtuo ang country director sa HLI nga kung makahuygo na ang simbahan sa gilusad niining signature campaign, hingpit na unyang mabasura ang balaudnon.

“Sigurado gyud na nga mag-anam unya ka daghan ang mga congressman sa tibuok Pilipinas nga mobali ngari sa side sa pro-life,” sumala ni Bullecer.

Gipaabot nga sugdan niining semanaha sa 142 ka parokya sa Sugbu ang signature campaign sa simbahan nga gilusad niadtong miaging semana.

Usa ka milyon ka pirma ang gitinguha sa Archdiocese of Cebu nga hipuson aron maoy isuporta sa ilang pagbabag sa Reproductie Health Bill.

Niingon si Bullecer nga ang gipaabot na lang niini mao ang giusab nga explanatory content aron mapasabot ang mga parokyano sa katuyoan sa simbahan.

Gipadayag ni Bullecer nga sila andam mopasiugda og halapad nga lihok-protesta kung gikinahanglan.

Sa kasamtangan 60 na ka kongresista ang nipadayag og suporta sa kampanya sa mga pro-life group pagbasura sa kontrobersyal nga balaudnon.