Quiot mosalo sa pundo ni Cuenco

Nagpanikad na si Quiot barangay captain icente Go nga maoy motiwas pagpatuman sa Goat Dispersal Program ni Kongresista Antonio Cuenco.

Kini human usab makahukom ang kongresista pagbawi sa nahabiling pundo gikan kang Guadalupe barangay captain ug ABC president Eugenio Faelnar.

Si Go maoy nahuna-hunaan ni Cuenco nga patiwason sa pag-implementar sa iyang programa tungod sa nagkaaslom nilang relasyon ni Faelnar.

Gikalipay sa kapitan ang nakab-ot nga desisyon sa kongresista tungod kay giingong haom usab ang pipila ka sitio diha sa ilang barangay sa maong programa.

“Nindot kaayo na nga proyekto, feasible kaayo na sa among barangay kay naa man tay lima ka mountain sitios,” sumala ni kapitan Go.

Gipasalig hinoon sa kapitan nga iyang apuran og mga kanding ang 14 ka mga bukirang barangay sa habagatang distrito sa siyudad.

Ang gipaabot na lang ni Go mao ang pundo alang niini aron masugdan gilayon paghan-ay ang pagpatuman sa maong programa.

“Ato usa nga tan-awon kung naa pa bay kwarta kay lisod man kaayo og magplano ta unya wala pa ang kwarta,” dugang pamahayag ni kapitan Go.

Una na hinoong gipasalig ni Faelnar nga iyang itugyan ang nahabiling pundo ngadto sa kongresista sulod niining semanaha.

Giingong mokapin pa sa P8 milyones ang nahabilin sa P15 milyones nga alang sa pagpang-apod-apod og mga seedling ingon man sa mga kanding.

Apan wala pa kasugdi pagpatuman ni Faelnar ang Goat Dispersal ug kini maoy gusto ni Cuenco nga tiwason ni Go sa pag-implementar.

Gipahibawo ni Go nga iya unyang katambayayong sa pagpatuman sa nahisgutang programa mao si Labangon barangay captain Felix Abella subay sa task force nga ilang hulmahon aron maoy moplantsa sa pagpatuman sa programa.