Sakop sa Lupon gipatay

Napusilan patay ang sakop sa Lupong Tagapamayapa sa barangay Granada lungsod sa Boljoon human kini namadlong sa mga estambay nga naglalis samtang nag-inom sa sitio Balitang sakop sa nahisgutang barangay niadtong Domingo sa alas 10:30 sa gabii.

Ang biktima mao si Samuel Aproenchado Bruce,71, samtang ang suspek mao sila si Bhoy Racaza, gwardiya sa usa ka beach resort nga nahimutang sa maong lungsod ug lumad nga taga barangay Taculing Bacolod City, Negros Occidental ug kauban niining si Reynaldo delos Santos Cartalla, 44.

Matud pa ni SPO3 Joseph Yongco sa Boljoon Police dihang nahinabi sa Banat News natulog ang biktima sa ilang balay ug nahigmata tungod sa kasaba sa mga suspek nga nag-inom sa gawas dili layo sa ilang balay.

Nanaog ang biktima ug gibadlong ang mga suspek apan matud pa nitubag ang usa kanila “wala raba ko mahadlok bisan og ka 20 na kapatay.”

Matud ni Yongco gigunitan ni Reynaldo sa abaga ang biktima ug gitukmod kini, dihang nisarasay ang biktima nibunot og armas ang laing suspek nga si Racaza ug gipusil ang biktima ug naigo sa tuong bahin ilawom sa abaga.

Daling nisibat ang mga suspek ug ang biktima gidali pagdala sa mga silingan sa Oslob District Hospital apan gideklarar kini sa mga doktor nga dead on arrial samtang mieskapo ang duha.

Ang kapulisan naka-recoer og usa ka kabhang sa bala sa crime scene gikan sa Super .38 nga pistola.