Ulo gisab-it sa punoan sa kahoy

CEBU  - Naukay ang mga residente sa sitio Kaymitohan, barangay Sapangdaku kagahapon sa alas 11:00 sa buntag human usa ka ulo nga gituuhang iya sa usa ka menor de edad ang nakit-an ubos sa usa ka bakilid nga nagsangit na sa kahoy diha sa ilang lugar.

Sila si Diosdado Abella, 28, mekaniko, Rico Enero, 20, ug Allan Lausa, 20, pulos mga residente sa lugar maoy nakakita niini sayo kagahapon sa buntag dihang nanguhag “Kurakol”—usa ka klase sa kinhason sa bukid sa maong dapit.

Gikatahong usa ka kolor yellow nga plastic bag ang ilang nakit-an ang gisangit sa duha ka sanga nga dunay gitapok nga dahon, nakapahibulong sa mga polis mao nga uga na kaayo ang maong ulo nga kalabira apan ang plastic bag bag-o pa kaayo.

Si SPO2 Rey Cuyos, imbestigador sa Homicide Section sa Cebu City Police Office nga gikahinabi sa Banat News nagkanayon nga usa ka Arcias Abella nga maoy agalon sa tulo ka nakakita sa maong kalabira maoy unang gipahibalo ug mao nay mitawag sa kapolisan.

Ang dapit nga diin makit-i ang kalabira gibana-banang usa ka kilometro gikan sa karsada pasaka sa pangpang nga milanat og 30 minutos nga pagkatkat.

Matud pa ni Cuyos nga sa pagkakaron dili pa nila matino kun ulo ba kini sa usa ka bata o hamtong nga tawo gumikan kay ila pang ipasusi sa mga doktor ang maong kalabira.

Susihon pa usab sa kapolisan ang records sa ilang buhatan gumikan kay dunay report kaniadto kabahin sa usa ka 13-anyos nga batang missing sa maong dapit niadtong 2006.

Usa ka barangay tanod sa dapit nga si Pedencio Baclayon ang nitug-an sa mga tigbalita nga wala na nila mailhi pa ang duha ka mga magtiayon nga maoy ni-report kaniadto diha sa barangay hall sa Sapangdaku ug Guadalupe labot sa pagkahanaw sa ilang 13-anyos nga anak lalaki niadtong 2006.

Gikatahong tinun-an kini sa 2nd year sa Abellana National High School ug giingong miyembro usab kaniadto og gang nga mag-estambayan sa barangay Guadalupe.  (BANAT NEWS)