Tawo giatsa kritikal

CEBU – Kritikal ang kahimtang sa usa ka tawo human kini atsaha sa usa ka hubog didto sa Sitio Dawis, barangay Lamintak Norte lungsod sa Medillen niadtong Sabado sa alas 5:00 sa hapon.

Ang biktima mao si Fidelis Ancero Ortega, 44 , minyo nga taga Dawis, samtang ang suspek mao si Gregorio Rivera, 69 , minyo, silingan ra sa biktima.

Matud ni PO1 Anarciso Supilanas sa Medillen Police Station nga nahinabi sa Banat News nga ang biktima kauban sa iyang mga paryente ug barkada nag-inom, dihang kalit lang niabot ang suspek nga hubog nga nagdala og atsa nga gamitonon sa pagbuak og lubi ug sa pagpamutol og kahoy ug miapil dayon og inom sa grupo sa biktima.

Gumikan kay pulos hubog, mitumaw dayon ang lalis sa duha, ug dihang nahutdan sa katarungan ang suspek, gibugha dayon sa iyang atsa ang ulo ug walang abaga sa biktima.

Gumikan sa kabalaka nga bughaon usab sila, ang mga paryente ug barkada sa biktima walay nahimo gawas sa paghatod nila sa naulahi ngadto sa Verallo District Hospital sa dakbayan sa Bogo City nga ubos sa talandugong kahimtang.

Hinuon nasikop usab dayon ang suspek sa mga pulis nga miresponde sa maong alarma.

Nasayran usab sa kapulisan nga ang suspek borukinto kaayo sa ilang lugar ug kanunay lang makakita og away ilabina kun mahubog. – BANAT NEWS