Gipatay sulod sa diskoral

CEBU – Nataruyan sa kutsilyo ang buko-buko sa usa ka mag-uuma human kini dunggaba sa laing mag-uuma samtang nagsayaw-sayaw sulod sa diskoral alas 2:30 kagahapon sa kaadlawon diha sa sitio Kamandagan barangay Sirao ning dakbayan.

Ang biktima nga nalandig sa usa sa mga pribadong tambalanan ning dakbayan giila sa kapulisan nga si Catalino Bonghanoy, 49, nagpuyo sa nahisgutang dapit, samtang ang suspetsado gikatahong ginganlan lang og “Naldo Bontilao” usa usab ka mag-uuma nga taga barangay Taptap.

Sa imbestigasyon nila ni SPO1 Rogelio Nedamo ug mga kaubanan sa Homicide Section dihang kalit lang kining giduol sa suspek ug walay daghang pangutana gitampukan og kutsilyo ang likod sa biktima.

Gikatahong hubog ang suspek niadtong tungura ug gikatinubagay sa biktima nga miresulta sa panaglalis ug gisumbag sa suspek si Bonghanoy, dihang nahagba kini sa yuta diha-diha gikabay-an kini sa suspek ug gidunggab ang likod.

Wala na madakpi ang suspek kinsa daling misagol sa mga nagkatibulaag nga mga tawo samtang ang biktima gidala ngadto sa tambalanan. – BANAT NEWS