Mananagat gidunggab patay

CEBU – Walay suwerte ang usa ka mananagat nga gikan nga nanglimpyo sa iyang sakayan nga gibutang daplin sa baybayon human kini giatngan ug gidunggab-patay sa iyang pagpauli sa sitio Kantao-an barangay Esperanza lungsod sa Poro isla sa Camotes niadtong Biyernes sa alas 5:30 sa hapon.

Ang biktima giilang si Benigno Heyroso, 40, nagpuyo sa nahisgutang lugar ug pagpangisda ang pangita, nadakpan hinuon dayon ang suspek nga giilang si Oliver Escoton, 28, nagpuyo sa susamang lugar.

Subay sa imbestigasyon sa kapulisan ang biktima gikan nga naglimpyo sa iyang sakayan niadtong tungura ug paingon na untang mopauli dihang gisugat sa suspek.

Gisubay pa sa kapolisan kung unsay motibo sa suspek sa pagbuhat niini ngadto kang Heyroso kinsa nakaangkon og mga samad pinusilan sa nagkadaiyang parte sa kalawasan nga nakaingon sa hinanali niining kamatayon.

Nakuha diha sa crime scene ang nagkadugong kutsilyo nga maoy gituohang gigamit pagpatay. Ang suspek natingkagol na karon sa detention cell sa kapulisan sa Poro human boluntaryong mitahan sa iyang kaugalingon human sa hitabo. – BANAT NEWS