Polis gihulga sa hubog

CEBU – Nagtingkagol sa Talisay City detention cell ang usa ka 31-anyos nga lalaki kinsa giingong hubog human kini manghasi sa iyang kaipon ug nanghulga sa mga polis ug barangay tanod nga miresponde kagahapon sa kaadlawon sa sitio Laray, Barangay San Roque sa nahisgutang dakbayan.

Ang suspetsado mao si Christopher Lausang, residente sa nahisgutang lugar kinsa gipasanginlan sa iyang kapuyo nga si Annabelle Chua, 47, residente usab sa lugar nga nanghagis ug misagpa kaniya ug miguba sa monitor sa iyang personal computer niini.

Ang maong insidente nahitabo mga alas 11:00 sa gabii niadtong Sabado sumala pa sa mga polis.

Gikatahong hubog si Lausang niadtong tungura ug gikakomprontase si Chua, human sa hitabo daling mitaho sa kapolisan ang babaye apan dihang miresponde na ang mga polis ug mga tanod ngadto sa lugar nga nahitaboan si Lausang ang daling miikyas.

Apan mga ala-1:20 kagahapon sa kaadlawon si Chua ang nanawag sa mga polis tungod kay si Lausang mibalik diha sa iyang balay ug nanghasi na usab ug nagdala na og sundang.

Ang kapolisan pinangulohan ni SPO1 Arturo Andales uban sa mga tanod daling miresponde sa maong alarma apan giingong sila gihulga sa suspek sa pag-ingon, “bisan kinsa ang mosulod ninyo naa gyu'y usa kuha-on.”

Bisan pa man sa hulga wala mangahadlok ang mga polis ug gikalitan og hamag hinungdan sa pagkasikop niini ug nakuha gikan kaniya ang 16-pulgadas nga sundang.

Si Lausang ang mag-atubang og kaso nga ipasaka sa mga polis batok kaniya. – BANAT NEWS