PNP, teachers ug Dept. Heads gikiha

CEBU – Mga polis, department heads, opisyal ug magtutudlo sa lungsod sa Tudela, isla sa Camotes ang gipasakaan og reklamo ngadto sa Ombudsman Visayas ni Mayor Rogelio Baquerfo Sr. tungod kay wala kini motuman sa iyang kamanduan.

Ang mga gireklamo ni Baquerfo nga mga department heads ug kawani sa munsipiyo mao sila si Marilyn del Socorro, accountant, Felicida Sano, budget officer, Restituto Arguedo, treasurer, Emerito Labajo sa Municipal Planning Development Coordinator (MPDC), Pedro Cisnero, Municipal Engineer, Victoria Nocellas sa Department of Agrarian, Dr. Jose Bardelas sa Rural Health Unit ug ang postmaster nga si Bernardo Estrera.

Ang mga kawani sa Department of Education nga sila si Ella Estremos nga maoy Prinsipal 1 sa Buenavista, Relyn Solante, officer in charge sa Puerto high school extension, Nymfa Orge magtutudlo sa kindergarten sa central school ug Elsie Martinez magtutudlo sa Puerto National High School ang nasugamak usab og reklamo ni Baquerfo ngadto sa Ombudsman Visayas.

Lakip sa mga gipangreklamo sa Mayor sa Tudela ngadto sa Ombudsman ang kapolisan sa lungsod nga sila si SPO3 Torres, SPO3 Rito Estrelaos, SPO4 Sulpicio Montuerto, SPO3 Luiferna Plaza ug PO1 Flordeliz Contratista.

Ang maong reklamo ang naduso ngadto sa buhatan sa Ombudsman Visayas niadtong Hulyo 10, 2008.

Si Baquerfo sa iyang affidavit nagkanayon nga siya maoy incumbent nga mayor sa lungsod sa Tudela ug isip mayor sa lungsod miluwat siya og memorandum niadtong Hunyo 25, 2008.

Sa maong memorandum gipahibawo ni Baquerfo ang Bise Mayor, Sanggunian Bayan, tanang mga department heads ug kapitan sa kabarangayan ug ang mga opisyal sa local government unit nga dili pa angayang tuohan ang milingkod sa pwestong si Demetrio Granada isip mayor sa lungsod tungod kay sayo pa kaayo.

Kahinumduman nga niadtong Hunyo 24 mipagawas ang DILG-7 og opinion nga nagpadayag nga si Baquerfo pa gihapon ang padayon nilang giila isip mayor sa Tudela ug mimando kang Granada sa dili una paglingkod sa munisipyo hangtud wala pay resulta sa mga petisyong gihusay diha sa korte ug sa Comelec.

Apan matud ni Baquerfo bisan paman sa maong memorandum ug kamandoan gikan sa DILG ang mga nahisgutang public officials wala gihapon motuman sa iyang direktiba.

Sa affidavit usab ni Baquerfo nagkanayon kini nga ang nahisgutang mga polis ang wala usab motuman sa laing kamanduan sa DILG sa pagpahunong kang Granada sa iyang padayong pag-asumir sa buhatan hinungdan sa iyang pagkasagmuyo.

Ang mga gireklamo  gihatagan og 10 ka adlaw sa pagsumitir sa ilang counter-affidavit kabahin sa maong pasangil batok kanila. – BANAT NEWS