CEBU - Patay ang usa ka 36-anyos nga drayber sa traysikad human kini pusila sa wala mailhing kriminal kagahapon sa kaadlawon sa sitio Sambag, barangay San Roque, dakbayan sa Talisay.
Ang biktima giila sa mga polis nga si Jose Dinnie Biton alyas “Bobit” residente sa nahisgutang barangay kinsa gidala dayon ngadto sa Talisay City District Hospital apan gideklarar nga patay na nga naabot sa nahisgutang tambalanan.
Si Biton nakaangkon og samad pinusilan sa tiyan nga milapos sa buko-buko ang bala ingon man sa walang bahin sa ulo niini nga gituuhang gihapak og usa ka gahing butang.
Sa imbestigasyon sa mga polis nga si Biton uban sa iyang mga higala nga sila si Ronald Baculao, Daniel Labandero ug laing tulo nga nag-inom diha sa video bar diha sa lugar nga naghitaboan.
Si Biton nananghid sa iyang mga higala nga mouna og uli ug dihang nagpaingon kini sa iyang traysikad kalit lang nga mitungha ang usa ka lalaki ug walay pangutana gipusil ang biktima. Banat News