CEBU - Gideklarar sa konseho sa siyudad sa Sugbu nga Alay Lakad Week sa kinatibuk-ang dakbayan ang Septiyembre 15 hangtud sa Septiyembre 21.
Subay niini, giawhag sa City Council ang nagkadaiyang ahensya sa gobiyerno nga anaa dinhi sa siyudad nga mosuporta sa kasaulugan bisan na lang sa pagbutang og nagkadaiyang mga streamers diha sa tagsa-tagsa nila ka mga buhatan.
Lakip sa giawhag sa konaaseho nga moobserbar sa Alay Lakad Week mao ang mga industrial ug commercial establishment sa dakbayan.
Labaw nang gidasig sa City Council nga moduyog sa kasaulugan mao ang ubay-ubay nga mga kolehiyo ug unibersidad nga nahamutang sa siyudad.
“Kagalingan ng Kabataan, Responsibilidad ng Bayan”, maoy tema sa Alay Lakad Week niining tuiga.
Ang Alay Lakad gipasiugdahan sa Department of Social Welfare and Development (DSWD) sukad pa niadtong dekada 70.
Tumong niini nga makakuha og pundo nga magasto sa gipasiugdahang mga programa alang sa mga out-of-school youth.
Sa kasamtangan, mokapin na sa usa ka libo ka mga batan-on sa siyudad ang nakapahimulos sa pundo nga nakolekta gikan sa Alay Lakad pinaagi sa scholarship grants, vocational skills training, leadership seminar, scouting, basic business management ug livelihood activities.
Ang mga scholars anaa gibansay-bansay sa Technical Education and Skills Development Authority (TESDA) ingon man sa Department of Manpower Development and Placement (DMDP) diha sa Cebu City Hall. Banat News