Balaudnon pagbuwag sa Banawa ug Englis

CEBU - Gitinguha ni Cebu City South District Congressman Antonio Cuenco nga mabuwag na ang Banawa ug Englis sa barangay Guadalupe pinaagi sa pagpalabang og balaudnon sa Ubos Balay Balauranan sunod semana nga alang sa nahisgutang katuyoan.

Matud sa kongresista nga siya mismo maoy moabaga unya sa galastuhan alang sa boundary survey sa Banawa ug Englis gikan sa Guadalupe.

Target ni Cuenco nga mapahigayon ang plebisito sa tunga-tungang bahin sa sunod tuig alang sa hingpit nang pagbuwag sa duha ka sitio.

Gitataw sa kongresista nga siya napugos sa maong lakang tungod usab sa hangyo sa mga molupyo sa Banawa ug Englis tungod kay gusto nilang mabuwag sa Guadalupe tungod kay sila giingong gibiyaan ug gipasagdan sa ilang kapitan.

Gikataw-an lang hinuon ni Guadalupe Barangay Captain Eugenio Faelnar ang rason sa ilang kongresista tungod kay giingong nasayod na ang kinabag-an sa Guadalupe sa tinuuray nga hinungdan.

Apan matud ni Faelnar nga siya walay problema kung mabuwag na ang duha ka sitio tungod sa kadako usab sa ilang barangay.

Giklaro hinuon sa kapitan kinsa mao usab ang ABC president sa dakbayan nga wala niya pasagdi ang mga molupyo sa duha ka sitio.

Apan wala hinuon siya mosulti kung unsa ang iyang mga nahimo, apan nidugang ang kapitan nga ang mga molupyo mismo maoy makasulti niini.

“Ipapangutana lang sa mga molupyo sa maong mga sitio kay self-serving kung ako pay mosulti kung unsay akong nahimo,” sumala ni Faelnar kinsa midugang usab nga wala niya isipang personal nga kasungian ang hinungdan sa maong lakang ni Cuenco.

Nagsugod ang dili maayong buot sa duha ka opisyal dihang gikaibog ni Faelnar ug sa ubang mga kapitan sa habagatang distrito sa dakbayan ang gihimong mga proyekto ni Kongresista Raul del Mar sa north district.  Banat News