1yr. old napaig sa sunog

CEBU - Napaig ang tibuok lawas sa usa ka pa ka tuig nga batang babaye human masunog ang ilang payag-payag sa barangay Galatagan, lungsod sa Samboan niadtong Huwebes sa buntag.

Ang biktima giila sa kapulisan nga si Jenny Catubig anak nila ni Emirito ug Gina Catubig nga nagpuyo sa nahisgutang dapit.

Sa imbestigasyonsa kapulisan sa nahisgutang lungsod gikatahong kauban sa biktima ang duha niini ka mga igsuong babaye nga sila si Rasel 2, ug 4 anyos nga wala hinganli diha sa ilang payag gawas sa ilang balay.

Gikatahong nagpasuso niadtong higayuna ang inahan sa mga bata nga si Gina kinamanghurang anak nga pila palang ka bulan sulod sa ilang balay samtang ang ilang amahan nanaka og lubi aron mananggot.

 Gikatahong nagduwa-duwa og lighter ang duha ka mga maguwang sa biktima mga alas onse sa buntag niadtong adlawa ug sa tanto nilang duwa sa kalayo naduslitan nila ang ugang mga kumpay hinungdan sa pagsilaob sa ilang payag.

Si Police Inspector Marlon Gumabao hepe sa Samboan Police Station nibutyag gibanabanang 10 metros lang ang gilay-on sa payag gikan sa ilang balay.

Matud pa ni Gumabao nga ang inahan nga si Gina uwahi ng nakabantay sa kalayo sanglit nikatap na kini ug dali kaayong gilamoy ang payag nga ginama sa gaay.

Ang 2-anyos nga si Rasel nakadagan palayo apan nakaangkon kini og first degree burn, samtang nakalingkawas usab ang 4 anyos apan way swerte si Jenny kay wala na kini makagawas ug napaig sa kalayo. - Banat News