PDEA-7 gidayeg ni Usec Paul

CEBU - Gikalipay ni Dangerous Drugs Board Undersecretary Paul Clarence Oaminal ang malampusong operasyon sa mga ahente sa Philippine Drug Enforcement Agency (PDEA-7) human nasikop niini ang level 2 drug pusher diha sa barangay Duljo-Fatima niadtong milabay'ng adlaw.

Nasayran nga si Marlon Cuizon nakuhaan og 149 ka mga gagmay’ng pakete nga gituuhang shabu ingon man upat ka deck sad ang nakuha sa possession sa iyang bata-bata nga si Ricardo Dinawanao.

Matud pa ni Oaminal nga ang maong malampusong operasyon resulta na kini sa pulong-pulong sa maong barangay ug PDEA dihang iyang gibaharang puhagon ang mga nalambigit sa ginadiling drugas sa maong lugar ug ubang mga area dinhi sa dakbayan ug sa Central Visayas.

Nagpasalamat usab siya sa mga lokal nga opisyal sa barangay Duljo-Fatima nga nikuoperar pakigbatok sa ginadiling drugas sa maong barangay nga usa sa mga gihugpaan sa mga drug lords.

Matud pa niini nga si Cuizon usa kini sa ‘‘Top 10 list” sa ilang order of battle sa maong barangay gumikan kay maka-disposed kini og usa ka kilong shabu matag semana.

Samtang gipahibalo niini nga nihimo na siya karon og mga lakang nga kadtong mga concerned citizen ug mga tanod ug uban pang mga tawo nga makahatag nilag impormasyon sa DDB ug PDEA hatagan nila’g pasidungog bisan gamay isip pasalamat.

Kumpiyansa siya nga pinaagi sa kooperasyon sa mga lumolupyo sa kabarangayan ug pinaagi sa subsob nga mga seminars mapugngan ang maong bisyo ingon man masikop ang mga drug pushers. – Banat News