Amahan giluba og botelya sa anak

CEBU - Natuhab ang tiyan sa usa ka amahan dihang gidunggab kini'g buak nga botelya sa iyang anak babaye niadtong Miyerkules sa gabii didto sa barangay Biasong, Talisay City.

Ang biktima mao si Mario Mercader, 50, taga Biasong, samtang ang miduslak kaniya mao si Maria Lourdes Salinanac, 29, minyo, silingan ra sa iyang amahan.

Ang biktima samdan sa walang tiyan agi sa buak nga botelya, samtang ang suspetsado nagisian usab sa nawong ug nawingig ang apapangig niini dihang giparok siya sa biktima sa bongbong sa ilang balay.

Si PO2 Roy Lofranco, PO2 Estephen Sefuesca ug PO1 Ruel Santinitigan miasoy sa Banat News nga puro lasbag ang amahan ug anak sa maong hitabo kay puwerting inom niini ug nagkinantahay pa sa wala pa mahitabo ang pagdinumogay nila.

Apan dihang nakita sa suspetsado nga nagpabadlong ang iyang gamay'ng anak, iya kining gibuno og kutsara.

Gumikan niini, gibadlong siya ni Mercader, nga iyang amahan, apan misilaob ang hilabihang kapungot sa suspetsado nga maoy sinugdanan sa init nilang lalis.

Dihang wala kaagwanta, milanit ang suspetsado sa iyang kutsilyo ug gihansak sa iyang amahan, ug maayo nalang kay natapi ug nailog sa naulahi ang kutsilyo ug didto giparok sa bongbong sa balay ang nawong sa suspetsado hinungdan sa paghuboy ug pagkasamad hangtud nga nawingig kini.

 Mibiya na unta ang biktima sa maong lugar niadtong higayona dihang gigukod kini sa suspetsado nga nagbitbit og buak nga botelya ug sa walay daghang langas, giduslak ang walang kilid sa iyang amahan

hinungdan nga natuhab kini.

Nataymingan usab nga maoy pag-abot sa kapolisan ug naabtan sa akto ang maong hitabo hinungdan nga wala matiwasi sa suspetsado pagpatay ang iyang amahan.

Ang duha gidala ngadto sa Talisay City District Hospital ug human matambali ang ilang mga samad, gibalhog usab dayon sila sa prisohan. – Banat News