Medellin sementado na

CEBU - Puwerting lipaya sa mga molupyo sa lungsod sa Medellin karong magbahas-bahas na ang mga sakyanang de motor sa barangay Lamintak Sur, Medellin, human kini masemento niadtong Mayo ning tuiga.

Ang maong proyekto gipatuman ni Gobernador Gwen Garcia pinaagi sa tampo-tampo nga paagi.

Sa maong sistema matag barangay motampo sa paghatag og semento ug ang Kapitolyo nay mopatrabaho aron masemento ang ilang karsada

Nahimo kini dihang misugot ang mga opisyal nga ang mga semento nga gihatag sa Kapitolyo gamiton aron sa pagpakonkreto sa mga karsada sa Lamintak Sur.

“Mosakripisyo una ang uban alang sa kaayohan sa tanan,” matud pa sa Gobernador kinsa miingon nga ang tanang 19 ka barangay miuyon nga mohatag usab sila og sinakong semento aron masemento na ang tanang karsada sa kabarangayan sa Medellin.

Nanghinaut si Garcia sa susama unta ang ubang lungsod nga molihok sama sa lungsod sa Medellin.

“Mao ni ang gitawag og tampo-tampo,” matud pa ni Ricky Ramirez kinsa nadasig kaayo sa gipakitang serbisyo sa gobernador.

Si Garcia natandog ug nadasig sa pakig-alayon ug pakighiusa sa mga opisyal sa Medellin.

“Ako na ang labing inspirado nga nilalang karong adlawa. Kay kinsay dili ma-inspire nga pag-abot ko pa lang naningkamot na gyud nga mapakita and mainit nga pagtagad ug pagtratar kanako,” matud sa gobernador atol sa iyang pagbisita sa naasoy'ng lungsod niadtong Huwebes.

Niadtong adlawa ang fire ug police sub-station giinagurahan usab sa gobernador diha sa barangay Kawit. – Banat News