DOH gihagit papuy-on sa Maghaway

CEBU – Mga residente sa barangay Maghaway, dakbayan sa Talisay kinsa nagpuyo duol sa nahimutangan sa tulo ka cell sites sa tulo ka telecommunications company mihagit sa sakop sa Department of Health nga mopuyo bisan og usa ka buwan diha sa ilang lugar aron masinati usab niini ang ilang gipamating sakit-sakit sa lawas.

Kahinumduman nga ang mga residente sa lugar ang miduso og reklamo ngadto sa konseho sa dakbayan kabahin sa ilang mga pasangil nga ang radiation sa mga cell sites ang hinungdan sa ilang mga gipamating kakulian sa panglawas.

Usa sa mireklamo nga gibati og panakit sa ulo mao ang prinsipal sa Maghaway Elementary School nga si Erwin Caparida.

Si Caparida sa pakighinabi niini sa Banat News kagahapon nagkanayon nga ang buhatan sa DOH sa kaulohan ug ang DOH-7 nagpadala og sakop nga mi-inspection sa lugar.

Si Engineer Dorren Casipong nga gipadala sa DOH-7 ug mosusi sa lugar miinsister nga walay kamatuoran ang pasangil sa mga residente nga tungod sa radiation gikan sa mga cell sites ang hinungdan sa ilang mga sakit.

Ang pamahayag niini nakapasuko sa mga residente ug mihagit kaniya pagpuyo diha duol sa cell site uban kanila bisan sulod lang sa usa ka buwan.

Si Casipong misanong sa gusto sa mga residente sa Maghaway apan matud niini nga mangayo una siya og permiso gikan sa director sa DOH nga tugotan siyang mopuyo diha duol sa cell site.

Matud ni Caparida nga naglaraw silang padalhan og suwat ang taga-DOH aron hangyuong tugutan si Casipong nga diha mopuyo sa ilang dapit.

Si Caparida midugang nga ang pagsakit sa ulo ug ang pagluha-luha sa iyang mata niining bag-o lang niya nasinati. – Banat News