Kapitan giliab sa hubog nga tanod

CEBU – Gidakop sa kapolisan ang usa ka kanhi hepe sa barangay tanod, kinsa gumikan sa kahubog, nangliab sa kapitan sa barangay Rizal, lungsod sa Pinamungajan niadtong Lunes sa gabii.

Ang nag-atubang karon og kasong direct assault mao si Rodrigo Ferras, 50, minyo, ug kanhi hepe sa tanod sa nahisgutang barangay.

Ang nagpadakop ug mipa-priso kaniya mao si Kapitan Joey Endino, 38, minyo ug nagpuyo sa barangay Rizal.

Si PO2 Dominic Pantajo sa Pinamungajan Police Station mitug-an sa Banat News nga nagpaingon nang mopauli ang kapitan sa ilang balay gikan sa barangay               hall.

Naagi-an niini si Ferras sa karsada   nga nagsigi og singgit singgit tungod sa kahubog ug dihang nakita niya ang kapitan kalit nga gihapak ang gisakyan niining motorsiklo hinungdan nga nihunong ang kapitan ug gibadlong si Ferras.

Apan nasuko kini ug gihagit og sinumbagay ang kapitan, ug wala pa makontinto giliab pa ang naulahi ug maayo na lang gani kay nakalingkawas ang kapitan, ug nakapangayo og tabang sa kapulisan ug gipadakop si Ferras.

Gibalhog dayon si Ferras sa prisohan samtang giandam ang kasong direct assault batok kaniya.