P.6M danyos sa Asturias fire

CEBU – Mokabat sa 600 mil pesos ang kinatibuk-ang danyos sa tulo ka balay’ng nasunog sa barangay San Roque lungsod sa Asturias niadtong Miyerkules sa alas 10:30 sa buntag.

Ang mga balay nga nasunog gipanag-iya sa mga magsuon nga sila si Isabelita Pasaylo Jaime, 53; Erlinda Pasaylo Diamada, 63 ug Rosaline Pasaylo Lacaba, 43.

Matud ni SPO1 Dennis Nocos sa Asturias Police dihang nahinabi sa Banat News nadawat nila ang alarma sa alas 10:30 sa buntag ug pag-abot nila sa lugar naugdaw na ang maong mga panimalay.

Wala hinuon kini makakaylap sa sikbit pang mga panimalay sa gawas kay gilibutan kini sa fire wall. Nakaresponde usab dayon ang duha ka mga fire trucks sa ilang munisipyo nga gidala sa mga fire brigade volunteers.

Apil sa miresponde ang kabumberohan sa Balamban nga matud pa ni FO3 Anselmo Balbona dihang nahinabi sa Banat News nga gipaubos lang nila sa 1st alarm ang sunog.

Matud ni SPO1 Nocos subay sa inisyal nilang imbestigasyon nagsugod ang sunog sa sala sa panimalay ni Isabelita nga gituohang electrical short circuit ug naatol usab nga walay tawo niadtong tungura hinungdan nga nidako ang kalayo.