Gikulata, gidunggab, gimartilyo ang ulo

CEBU – Gisulong unya gikulata ug pagkahuman gidunggab sa makadaghang higayon una pa bunali og martilyo ang ulo sa usa ka 72-anyos nga babaye sa iyaha ra usab nga pag-umangkon diha sa sitio Tapon, barangay Buenavista siyudad sa Carcar niadtong milabay’ng alas 7:00 sa buntag.

Ang biktima nga naka-angkon og daghang samad dinunggaban sa iyang bukton ug lawas ug duna pay samad- samad sa ulo mao si Rosario Lumansang, nagpuyo sa maong lugar.

Samtang ang suspek mao si Peter Lumansang, 25, nga silingan ra nila sa maong dapit kinsa giingong nanghagis diha sa ilang dapit.

Matud ni SPO3 Ruben Renes sa Carcar City Police dihang nahinabi sa Banat News nanghagis sa ilang pinuy-anan ang suspek ngadto sa mga ginikanan niini ug pagkahuman migawas sa balay.

Gikatahong giguba sa suspek ang bintana sa balay sa biktima ug misulod sa balay ug diha-diha nadunggan nalang nga misiyagit si Lumansang nga nangayo og tabang.

Matud sa mga silingan gitamparos, giparok-parok sa semento ug gibunal-bunalan og martilyo ang ulo dayon gidunggab og kutsilyo sa suspek si Lumansang.

Ang suspek nga nakabantay sa pag-abot-abot sa mga silingan og paryente daling misibat ug naabtan nalang ang biktima nga natumba sa sala nga nagkadugo ug dunay daghang samad dinunggaban sa bukton ug lawas ug samad usab sa ulo.

Daling gidala sa Vicente Sotto Memorial Medical Center ang biktima ug padayun pa karong giatiman sa mga doctor, samtang gisusi pa sa kapolisan kung unsay motibo sa suspek sa paghimo niini ngadto sa iyang iyaan.