Turismo sa Sugbu apektado kun way Sinulog

CEBU – Giangkon ni Tourism deputy secretary Phineas Alburo nga maapektuhan ang industriya sa turismo sa dakbayan sa Sugbu kini sa higayon nga dili gyud mahinayon ang Sinulog mardi gras sa buwan sa Enero sunod tuig.

Matud pa ni Alburo nga nailhan na ang Sinulog nga usa ka international event ug hugopan kini sa mga langyaw’ng turista.

Matud pa ni Alburo nga kung walay Sinulog activities posibleng mo-menus usab ang pag-abot sa mga turistang langyaw dinhi sa Sugbu sa buwan sa Enero sunod tuig.

Sa nasayran mihulga si Cebu City Mayor Tomas Osmeña nga kanselahon ang pagpahigayon og Sinulog sunod tuig.

 Kini human pahimangnu-i sa Commission on Audit (COA) ang siyudad sa Sugbu nga dili padonaron og pundo ngadto sa mga Non-Governmental Organizations nga ang naghupot mao ang ilang mga kabanay susama sa Sinulog foundation.

Gipasigarbo usab ni Alburo ang gidaghanon sa tourist arrivals dinhi sa Sugbu ning tuiga.

Base sa talaan nga gipakita sa Department of Tourism, gikan sa buwan sa Enero hangtud sa buwan sa Hunyo ning tuiga miabot na og 332,926 ang tourist arrivals dinhi sa Sugbu.

Misaka kini og 8.82 percent kung itandi sa milabay’ng tuig nga miabot lang og 305,950 ang tourist arrivals diin ang nag-una niini ang mga turistang Koreans ug Japanese nga mibisita dinhi sa Sugbu.

Matud pa ni Alburo nga ang kalampusan sa ilang promosyon sa tourism industry, maoy usa sa hinungdan sa pagsaka sa tourist arrivals sa Sugbu.