CEBU - Gipasakaan og kasong falsification of public documents diha sa prosecutor’s office ang kontrobersiyal nga tag-iya sa usa ka restobar nga niining bag-o lang gipasirado sa kagamhanan sa dakbayan sa Sugbo lakip ang pari nga business associate niini.
Ang maong reklamo ang giduso ni Juanito Lim sa Norte America Development Corporations batok kang Rodrigo Collarin ug Padre Gil Peter Coching human nga ang duha giingong mi-fabricate sa usa ka lease of contract nga naglambigit sa financial ug advertising support gikan sa kompaniya sa softdrinks.
Si Lim nagkanayon nga ang iyang kompaniya ang nanag-iya og upat ka parsela sa lote nga nahimutang sa D. Jakosalem niining dakbayan kinsa si Collarin ug Coching ang giingong mi-deal niini ngadto sa prospective buyers apan wala kini mahalin.
Apan si Collarin ug Coching ang giingong misugyot nga i-convert ang 6,840 metro kwadrado sa maong lote ngadto sa usa ka carenderia o food joint.
Matud ni Lim nga misugot siya sa maong sugyot ubos sa kondisyon nga siya maoy finance officer, samtang si Collarin ang technical officer ug si Coching ang administrative officer.
Gawas niini, si Lim ang misugyot usab og laing kondisyon nga ibakante ang lugar kung ang corporation mogamit na sa luna.
Hangtud sa tunga-tunga sa milabay'ng tuig maayo ang dagan sa operasyon sa carenderia hangtud nga si Collarin ug Coching ang giingong mi-convert sa tibuok lugar ngadto og mga tindahan sama sa ‘Larsian style” nga walay kalibutan si Lim.Gikataho nga si Collarin ug Coching mipaubos og lima ka tuig nga kontrata sa Coke alang sa financial ug advertising support.
Matud ni Lim nga si Collarin mihimo og peke nga lease of contract sa property tali kaniya ug Norte America Development Corporation aron sa pagsuporta sa iyang gisudlang agreement tali sa Coke.
Giingon nga gipakita ni Collarin sa nahisgutang kontrata nga duna siyay 20 ka tuig nga lease of contract tali ni Lim nga makagamit sa luna.
Si Coching ang mipirma niini isip witness sa maong giingong bugos nga kontrata.
Si Lim ang mipasangil nga ang iyang pirma ang gisunod sa maong mga suspetsado.
Matud ni Lim nga gikomprontase niya si Collarin kabahin niini apan ang suspetsado ang giingong misulti ngadto kaniya nga mao kadtoy paagi aron makakuha og kontrata sa Coke.
Si Lim ang mi-request ngadto sa PNP Crime Laboratory sa pag-eksamin sa maong mga peke nga dokumento ug nasuta nga gisunod ang iyang pirma.
Si Romeo Varon ang forensic document examiner nagkanayon nga base sa iyang findings ang pirma ni Lim sa kontrata ang gisundog.
Ang kagamhanan sa dakbayan sa Sugbo niining bag-o lang ang miluwat og kamanduan sa pagpasira sa resto bar ni Collarin nga “Lets Morning The Night”.
Ang mga residente sa lugar ang mireklamo usab sa kasaba ug pollution tungod sa kusog kaayong tugtog gikan sa nahisgutang resto bar.