Kalunasan napiling bag-ong 'basurahan'

CEBU - Nakakita na og dapit si Mayor Tomas Osmeña nga mahimong katukuran og bag-ong sanitary landfill sa siyudad sa Sugbu human masutanga naghinobra na ang mga basurang gilabay diha sa maong landfill.

Ang 15 ngadto sa 20 ka ektarya nga pribadong luna giingong anaa mahimutang sa barangay Kalunasan ning dakbayan.

Matud ni Osmeña nga ang siyudad andam mogasto og hangtud ngadto sa P300 milyones alang sa paghimo og dalan ingon man sa pasilidad sa maong luna.

Gipasabot sa mayor nga haom butangan og landfill ang iyang nakita nga dapit diha sa nahisgutang barangay ug accessible sa kabarangayan.

“It’s accessible from the north and accessible from the south and it’s relatively traffic-free,” nagkanayon ang mayor.

Gawas niini niingon ang mayor nga dili usab kritikal sa watershed ang lugar og giingong dili usab lisod buhatan og dalan.

Taud-taud nang nangita ang dakbayan og dapit nga kabutangan og laing landfill agig pangandam sa pagkapuno unya sa Inayawan sanitary landfill.

Duna hinooy problema nga posibling motumaw sa plano ni Osmeña, ug kini mao ang pagsupak sa mga molupyo sa barangay Kalunasan.

Ang kapitan sa nahisgutang barangay nga si Edelito Mabano niangkon nga siya nakalitan ug nasurpresa sa plano sa mayor human sultihi niini.

Niingon si Mabano nga iya unang konsultahon ang mga sakop sa konseho sa barangay ingon man ang iyang mga konstituwente labot sa maong plano.

Posibleng matuki ang maong hisgutanan atol sa gitakdang barangay assembly karong Oktobre 5 diin imbitado usab ang mayor.

Apan gipadayag na ni kapitan Mabano nga sa iyang personal nga kapasidad siya dili pabor nga butangan og landfill ang ilang barangay.

“Dili gyud maayo kay ang tanang baho murag ari ilabay sa among barangay unya kining Kalunasan, okay pa kaayo ang environment,” sumala ni Mabano.

Nidugang hinoon ang kapitan nga kung ang kadaghanang molupyo mouyon sa plano ni Osmeña siya dili mobabag niini.