Marimon gilubong kagahapon

CEBU - Gilubong na kagahapon sa alas 3:00 sa hapon ang kapitan sa barko nga Princess of the Stars nga si Captain Florencio Marimon Sr. diha sa Pardo Roman Catholic Cemetery sa barangay Poblacion, Pardo.

Hugot nga seguridad gihapon ang gipatuman diin pipila lang ka mga sakyanan ang gipasulod og gidid-an ang mga sakop sa media nga makaduol sa lubong gawas lang sa pagkuha’g pipila ka footages sa layo.

Dul-an sa 200 ka mga kabanay ug higala sa pamilyang Marimon ang nihatud sa lubong ug sa misa diha sa Sacred Heart Chapel.

Way mga kabanay nga nagpa-interview sa mga sakop sa media ug mga kahigalaan lang niini maoy nipadangat sa ilang sentimiyento.

Ang asawa ni captain Marimon ang gitabang sa iyang mga anak ug kabanay human usab kini makuyapi tungod sa kaguol.

Si Kagawad Concepion Dacayana sa barangay Cogon-Pardo nga close friend sa pamilyang Marimon nga nahinabi sa mga sakop sa media ang nipadayag sa iyang kasagmuyo sa ubang mga report nga gibasol ang kapitan.

Matud pa niini nga karon nga nailhan na, kini ug nalubong na angayang tapuson na usab ang isyu batok niini nga gikasakit usab sa pamilya tungod kay gihukman na kining daan.

Gikataho nga ang patay'ng lawas ni Marimon naila kini sa gipahigayong DNA-Testing sa mga sakop sa National Bureau of Investigation-Disaster Victim Identification, uban sa grupo sa International Police-International Commission for Missing Persons (ICMP) nga naa karon dinhi sa Sugbu.