Cortes 'mokiha' ni Fortuna kay mipakauwaw sa Cortes clan

CEBU - “Johnny came lately.” Kini ang paghulagway ni Mandaue City Mayor Jonas Cortes sa gihimong pagpagya ni Vice Mayor Carlo Fortuna sa mga ngalan sa paryente ni Mayor Cortes nga anaa magserbisyo sa mga departamento sa balay lungsod sa Mandaue.

Mibahad ang mayor nga pasakaan og kiha si Fortuna gumikan sa giingong pagpakauwaw niini ngadto sa iyang mga kaliwat samtang mao usab ang laraw ni Engr. Zoilo Cortes batok kang Fortuna kinsa nasagmuyo nga hasta iyang asawa gihinganlan sa bise mayor nga usa sa mga sakop sa “shadow government” ni Cortes.

Gikatahong nasagmuyo si Engr. Cortes tungod kay wala gani kataak sa merkado publiko sa dakbayan sa Mandaue ang iyang asawa ug gihinganlan hinuon ni Fortuna nga maoy nagkontrolar sa maong merkado. 

Matud pa ni Cortes nga hilas ra kaayo si Fortuna sa paghingalan sa mga Cortes nga gitawag niini nga ‘shadow government’ sa mayor apan wala niya iapil ang iyang kaugalingong iyaan nga si Anita Trasmonte nga igsoon sa inahan ni Fortuna ug si Guadalupe Latonio nga ig-agaw sa inahan ni  Fortuna nga mga sakop kini sa Council of Elders ni Mayor Cortes.

 Gipasabot ni Cortes nga ang tanan niyang gipangtudlo sa matag departamento sa city hall igo lamang kini nga mag-monitor ug moabag sa maong buhatan sigon sa iyang gihatag nga kamanduan ug kung adunay mga kakulian siya gihapon ang modesider niini.

Matud pa niini ang iyang mga paryente wala magdawat og bisan usa ka dako nga sweldo o honorarium gikan sa city hall, bisan na ang Council of Elders igo lamang moabag alang sa kalambuan sa Mandaue ug dili sama sa mga sakop sa konseho nga way gihimo gawas sa sige og babag sa mga proyekto nga iya raman unta kini sa katawhan.

Gumikan niini mipagawas usab og listahan si Cortes nga nagpakita sa mga kaliwat ni kanhi Mandaue City Mayor Thadeo “Teddy” Ouano lakip na ang sweldo ug benipisyo niini samtang nagtrabaho sa city hall.

Ang mga kaliwat sa kanhi mayor sa kinatibuk-an gikatahong nagdawatan og sweldo nga gibana-banang mokabat sa kapin P4 milyones gikan sa buhis sa mga Mandauehanon.

 Gihinganlan usab sa mayor og apil kadtong mga kaliwat sa kanhi mayor nga wala magdawatan og bisan piso nga sweldo apan tiggamitan og mga sakyanan nga iya sa dakbayan ug libreng tubil sa gasoline ug uban pang pasilidad nga gipanag-iya sa mga taga Mandaue.

 Tungod niini gikahibulong ni Cortes nganong karon paman mikihol si Fortuna ug wala niya kini pakganga dihang si Ouano pa ang mayor dihang siya usa pa ka konsehal.

Gipasigarbo hinuon ni Cortes nga nakamenos og gastos   ang dakbayan sa Mandaue sa libreng serbisyo nga gihimo sa iyang mga sakop sa banay.