Coastal barangay sa Talisay atimanon

CEBU - Ang mga coastal barangay sa dakbayan sa Talisay maoy unahon pag-atiman ni Konsehal Bernard Odilao inig patuman na sa Comprehensive Master Drainage Plan (CMDP) sa dakbayan.

Si Odilao nga maoy tsirman sa environment committee sa konseho sa dakbayan mibutyag sa Banat News kagahapon nga gihangyo niya ang iyang mga kauban sa konseho ug ang consultant sa maong proyekto nga ipauna ang mga coastal barangay inig patuman na sa CMDP tungod kay apektado na ang kadagatan sa siyudad sa mga hugaw nga tubig nga gibuga gikan sa mga establisamento.

Ang mga barangay nga anaa sa kabaybayonan naglakip sa Tangke, Cansojong Poblacion, Dumlog, Biasong, ug Pook.

Kahinumdoman nga ang mga molupyo sa sitio Asan, sa Barangay Cansojong mireklamo gumikan sa bahong tubig nga gibuga sa kanal sa usa ka pabrika sa bihon ug nagbuhagay kini paingon sa dagat.

Nasuta ni Odilao nga gawas nga baho, itom pa gyud kaayo ang tubig nga miawas usab sa karsada matag panahon nga mobunok ang uwan.

Matud ni Odilao nga sa milabay'ng duha ka semana nakigtagbo siya sa mga opisyal sa barangay, city engineering office,ug ang tag-iya sa pabrika sa bihon.

Apan matud pa ni Odilao nga dili lamang ang pabrika sa bihon sa Cansojong ang nagpabugwak og hugaw nga tubig paingon sa dagat kay nasayran niya nga aduna pay nagkalainlaing negosyo diha sa dakbayan kansang mga hugaw tua ipabuhagay sa dagat.

Matud pa ni Odilao nga nagkinahanglan gayud ang maong mga establisamento og water treatment aron ang ilang hugaw dili na modiretso ngadto sa dagat.

Si Odilao midugang nga ilang susihon ang tanang mga establisamento sa dakbayan ilabi na kadtong mga nagpabuhagay sa ilang mga hugaw ngadto sa dagat kung nakatuman ba kini sa mga balaod.