Kabanay sa C-130 victims nag-floral dropping

CEBU - Ang mga kabanay sa nangamatay nga piloto ug crew sa C-130 sa Philippine Air Force (PAF) nga nahagsa didto sa Samal Island sa Davao mihimo og floral dropping sa dapit nga nahitabuan kagahapon.

 Matud pa ni PAF/1Lt. Ramil Daet nga kagahapon sa alas 5:00 sa buntag mibiya sa Mactan Benito Ebuen Air Base ang maong mga kabanay sa unom ka mga tripulante sa C-130 nga nakalas sa maong trahedya.

 Ang matag usa sa maong mga tripulante girepresen-tahan og upat usab ka miyembro sa ilang banay nga gipakuyog ngadto sa Samal Island sa Davao alang sa gipahigayong Fluvial Mass ug Floral dropping sa dapit nahagsaan sa C-130.

 Miabot ang PAF poker plane sa tugpahanan sa Davao kagahapon sa alas 7:00 sa buntag ug ang ubang kabanay nga gikan sa Samar ug sa kaulohan nagkaabot didto ug gisugat sila sa mga dagkong opisyal sa Davao City sa pagpanguna ni Mayor Rodrigo Duterte ug ni Major General Hernani Perez ang 3rd Air Division Commander sa PAF.

 Usa ka misa ang gipahigayon sa Davao wharf ug pagkahuman luwan sa usa ka sakyanan sa dagat sa coast guard misakay ang mga kabanay paingon sa nahisgotang dapit ug didto gipanghulog nila ang mga bulak isip pagpakita sa ilang katapusang pagdu-aw, pagtahod ug pag-ampo sa mga biktima sa maong trahedya.

 Gumikan niini mapasalamaton ang mga kabanay ngadto sa mga kadagkuan sa PAF sa ilang maayong pagtagad ug paghatag og higayon nga makabisita sa dapit nga nahitabuan.

  Si Jacklyn Areola ang kapikas ni SSgt. John Areola nagkanayon nga bisan pa sa ulahing kalambuan nga  nakita na ang lawas sa C-130 ubos sa tabang sa usa ka US Navy ship, dako gihapon ang iyang pagtuo nga kompleto pa ang lawas sa iyang bana.

 Matud pa ni Areola nga human nila madungog gikan sa mga kadagkuan sa PAF nga napalgan na ang maong abyon ug anaa pa ang cockpit sa C-130, dako ang pagtuo ni Areola nga anaa ra ang iyang bana sa sulod sa maong cockpit sanglit tupad kining maglingkod sa piloto ug co-pilot gumikan kay si SSgt. Areola mao man ang flight engineer sa ilang biyahe.