Don Sergio garbo sa pamilyang Osmeña

CEBU - Sa makausa pa gipasigarbo ni Mayor Tomas Osmeña ang iyang apohan nga si Don Sergio Osmeña Sr., atol sa usa ka programa nga gipahigayon kagahapong adlawa agi'g paghandom sa ika-130 nga anibersaryo sa adlaw'ng natawhan niini.

Matud sa mayor nga si Don Sergio, dili lang garbo sa ilang pamilya apan garbo usab kini sa mga Sugbuanon tungod usab sa dungog nga nahuptan sa kanhi presidente.

Gipahinumdom ni Osmeña nga ang iyang apohan maoy labing batan-on nga sakop sa unang Philippine Assembly ug maoy unang nahimong speaker niini.

Gawas niini niingon ang mayor nga si Don Sergio napili usab nga speaker sa ika-duha, ika-tulo ug ika-upat nga kongreso.

“I really take great joy and cheer to see that he really truly excelled, he had done something that maybe no one else in the world has done to be the youngest member of your first congress or parliament and to be elected as the leader or speaker of the house,” sumala ni Osmeña.

Ang hamubong programa nga gipahinungod kang Don Sergio gitambungan sa iyang mga kabanay ingon man sa mga opisyal sa dakbayan, mga opisyal sa kabarangayan ug mga representante gikan sa nagkadaiyang ahensya sa kagamhanan lakip na gani sa militar ug kapulisan.

Ang apo ni Don Sergio nga si Antonio Osmeña nagpasalamat sa mga tawo nga mitambong sa gihimong kalihokan, nga nakahinumdom sa adlaw'ng natawhan sa iyang apohan.

Kahinumdoman nga si Don Sergio, nahimong konsehal ug gobernador sa Sugbu sa wala pa mapili nga assemblyman ug bise presidente.

Nahimong presidente si Don Sergio sa nasud dihang namatay si Presidente Manuel L. Quezon niadtong tuig 1944.