Marimon 'nakaplagan' na

CEBU - Nagkaguliyang kagahapon ang mga sakop sa media human dunay report nga ang kapitan sa nalunod nga barkong Princess of the Stars nga si Captain Florencio Marimon, Sr. gikatahong nakaplagan na.

Base sa nigawas nga report sa TV Patrol Central Visayas kagahapon ang mismong kawani sa Sacred Heart Mortuary ang mikumpirmar nga dunay nagpareserbang mogamit sa ilang kapilya nga ginganlan og Florencio Marimon.

Sa udto pa kagahapon giadto sa mga sakop sa media ang maong mortuary ug nakumpirmar gikan sa usa sa mga kawani nga gihaya diha sa ilang kapilya ang patay'ng lawas ni Marimon.

Sa di pa kumpirmadong report gikatahong niadto pa kining Lunes sa hapon gidala diha sa maong kapilya apan kagahapon sa hapon dihang gidugok na og mas daghang sakop sa media ang lugar nausab ang tonada sa mga kawani sa mortuary ug mihimakak nga naa diha gihaya si Marimon.

Sumala pa sa maong report diha sulod sa usa ka kapilya ang mga gituuhang kabanay ni Marimon apan walay bisan usa kanila ang miatubang sa mga tigbalita. Higpit usab kaayo ang gipatumang seguridad sa palibot niini ug gidid-an ang mga tigbalita nga makasulod.

Si Dr. Renato Bautista dihang gihinabi sa Banat News sa telepono midumili sa pagkumpirmar o ba kaha sa paghimakak nga ilaha nang nailhan ang na-missing nga kapitan pinaagi sa DNA Test.

“I can’t deny nor confirm your question,” matinahurong tubag ni Bautista kinsa midugang nga bugtong awtorisadong makatubag niini mao ra si Rosemarie Holganza-Borromeo ang gitudlong tigpamaba sa ICMP.

Si Bautista maoy pangulo sa National Bureau of Investigation- Disaster Victim Identification ug kabahin sa grupo sa mga sakop sa International Police- International Commission for Missing Persons(ICMP) nga dia karon sa Sugbu aron pagtabang pag-ila sa gatusang mga patay sa nalunod nga barkong MV Princess of the Stars.

Si Bautista ra usab ang awtorisadong mopirma sa mga death certificates sa mga mailhang patay una pa kini i-release ngadto sa mga kabanay.

Gisuwayan og tawag sa Banat News si Borromeo sa telepono niini apan pakyas ang tinguha, ang ICMP mopagawas og listahan sa mga mailhang biktima ug opisyal nga pamahayag matag adlaw'ng Huwebes.