Amerkanong namun-og gikasuhan

CEBU – Usa ka American national kinsa gipasanginlang mibun-og ug misuway sa pagpatay sa usa ka tiguwang lalaki pinaagi sa pagtuok sa liog   niini sa lungsod sa San Remegio ang nag-atubang og kasong kriminal diha sa Cebu Provincial Prosecutor’s Office.

Ang biktimang si Carlos Noynay, 62-anyos, residente sa sitio Biasong Maño, San Remegio ang mipasangil kang Mel Hickman usa ka Black American nga misuway sa pagpatay kaniya niadtong tungang gabii sa Agosto 27, dihang misuway siya sa pag-uwang sa iyang anak ug sa suspetsado kinsa nagkalalis niadtong higayona.

Matud ni Noynay nga gibunalan siya ni Hickman og kahoy ug gituok ang iyang liog hangtud nga nawagtangan siya sa panimuot.

Ang maong insidente nahitabo dihang ang suspetsado ug ang anak sa biktimang si Dodong nagkalalis samtang nakatulog na siya ug ang iyang asawa apan nakamata sila tungod sa mga dagkong tingog sa gawas.

Nakita ni Noynay ang iyang anak nga lalaki nga misinggit ngadto kang Hickman hinungdan nga iyaha kining giuwang apan samtang iyang gipasulod ang iyang anak sa balay si Hickman ang mikuha og kahoy ug gibunal-bunalan siya sa suspetsado sa likod hangtud nga nalup-og siya sa yuta.

Si Noynay mipasangil usab nga bisan og nalup-og na siya padayon gihapon sa pagbunal-bunal ngadto kaniya si Hickman ug gituok pa siya niini hangtud nga nawagtangan na siya sa panimuot.

Ang biktima ang nangayo og panabang sa kapolisan nga mapasaka ang maong kaso.