Dalan natak-upan tungod sa landslide

Laing landslide ang nahitabo sa Emie Road sa sitio Canduwang barangay Damulog lungsod sa Sogod niadtong Domingo sa alas 8:30 sa gabii.

Ang maong landslide nakaingon sa pagkabara sa mga sakyanan gikan ug paingon sa siyudad sa Sugbu ngadto sa amihanang bahin sa lalawigan kay di gyud kini maagian sulod sa pipila ka oras.

Kini gumikan sa nitabong mga yuta ug lapok diha sa karsada gikan sa kilid sa bukid.

Matud ni Insp. Ramon Lacno hepe sa Sogod Police dihang nahinabi sa Banat News ang pagsige og uwan maoy usa sa posibleng hinungdan sa paghunlak sa yuta ug bato gikan sa ibabaw nga bahin sa karsada.

Hinuon walay gikatahung naangol o nakalas sa maong hitabo tungod kay walay nangagi sa dapit dihang nahitabo ang paghunlak ug wala usab maabot sa upat ka mga balay sa pikas bahin sa karsada ang yuta.

Dunay report nga ang kanunay nga pagpangubkob sa mga bas ug anapog sa maong lugar maoy usa sa gibasol sa nahitabo ang landslide.

Nikabat pa ngadto sa tulo ka oras subling naagian sa mga sakyanan ang maong karsada human magtinabangay ang mga volunteer ug mga pulis paghawan sa natabunang gibana-banang tunga sa kilometro nga highway.

Matud ni Lacno nakamatikod nang daan nianang pagka adlawan pa ang pipila ka mga molupyo sa maong lugar tungod sa mga anapog nga naghinay-hinay og katagak hinungdan nga nagmatngon pag-agi sa maong lugar.

Wala isalikway sa kapulisan nga posibleng masubli pa ang maong landslide tungod sa pagkatipak sa pipila ka bahin sa yuta kilid sa dalan hinungdan nga nagbutang og signage nga nagpasidaan sa mga motorista pag-amping sa higayon nga moagi sa maong lugar