'Kalbaryo' sa Ban- Tal area traffic molanat pag 2 semana

Gipangayo karon ni Cebu City North District Congressman Raul del Mar ang pagsabot sa publiko ingon man sa mga opisyal sa dakbayan tungod sa extension nga gipangayo sa kontraktor nga nagtrabaho sa kontrobersiyal nga Banilad flyover.

Kahinumduman nga ang WT Construction nangayo og laing duha ka semana nga lugway sa ilang pagtiwas sa trabaho sa nahisgutang proyekto kini gumikan kay duna pay bahin sa maong flyover nga kinahanglang matiwas.

Una nang gipasalig sa kontraktor nga mahuman ang flyover sa hinapos nga bahin niadtong miaging buwan sa Hulyo.

Apan pakyas ang WT Construction sa ilang gipasalig tungod usab sa pipila ka katarungan hinungdan nga sila nangayo og laing lugway.

Septiyembre 5 ang sunod nga target sa kontraktor pagkompleto sa ilang trabaho, apan pakyas gihapon ang WT Construction sa maong pasalig.

Kini nakapadismaya sa pipila ka sakop sa konseho sa siyudad ingon man sa mga molupyo ug motorista nga apektado sa traffic congestion diha sa Banilad area.

Subli na usab karong gipasalig sa kontraktor nga hingpit na nilang mahuman ang katukoran sa Banilad flyover sa sunod semana.

“Ako gani ang naghatag ana nga deadline ngadto sa kontraktor pero we don’t want to end up with something defective nga proyekto, sa atong pag-apura kung dili nila madala unya nanginahanglan pa sila og duha ka semana, I don’t think that it’s too long to worry about,” sumala ni del Mar.

Gipasabot sa kongresista nga ang pagtrabaho sa flyover unya pa unta mahuman sa buwan sa Nobiyembre subay usab sa nalatid sa kontrata.

Apan tungod sa paspas nga pagtrabaho sa kontraktor, kini gipaabot nga mahuman sa dili pa ang gitakdang buwan.

Tungod niini, nangayo karon si del Mar sa pagsabot sa publiko ingon man sa mga opisyal sa siyudad sa gamay nga pagkadelatar sa proyekto sibo sa gipasalig sa kontraktor.