Duha ang gipatay sa Talisay

Duha ka mga tawo ang gipamusil-patay sa dakbayan sa Talisay sa managlahing dapit niadtong niaging gabii ug kagahapon sa buntag.

Usa ka habal-habal driver nga si Eric Bongad, 33, residente sa Hazienda Ferenzie ang nakaangkon og duha ka mga samad pinusilan sa iyang ulo, usa sa lubot sa wala pa matinong armas dihang gipauwana’g mga bala sa duha ka suspetsadong nagsakay og motorsiklo mga alas 11:20 kagahapon sa buntag diha sa may Urban Poor barangay Maghaway dakbayan sa Talisay.

Matud pa ni PO3 Edwin Alvarado sa Talisay Police Station nga gikahinabi sa Banat News nga si Bongad dead-on-arrival sa Talisay City District Hospital ang biktima.

Si PO3 Alvarado nagkanayon nga duha ka mga lalaki nga luwan sa kolor blue nga motorsiklo nagsul-ob og gray nga bonnet diin ang angkas niini maoy nipusil samtang nagsunod sa biktima nga nagdala sa iyang habal-habal.

Ang mga residente sa maong lugar daling nidala sa biktima sa tambalanan apan namatay na kini samtang ang mga mamumuno daling nakaikyas palayo sa lugar.

Padayon pa karong gisusi sa kapulisan ang nahisgutang lugar kun unsay motibo sa pagpamusil.

Samtang niadtong mga alas 6:30 sa niaging gabii usa ka Arturo Gabaca, 43, taga-San Roque sa nahisgutang lugar nga gipauwanan usab og mga bala sa duha ka mga mamumuno diha sa sitio Dawis sa nahisgutang barangay.

Si Gabaca nakaangkon og lima ka mga samad pinusilan diha sa nagkadaiyang parte sa lawas gikan sa wala matinong armas ug gideklarar nga dead-on-arrival sa Talisay City District Hospital.

Gikatahong si Gabaca gikan nagpalit og sigarilyo sa usa ka tindahan ug nakig-estorya daplin sa dalan sa iyang higala nga si Pablito Zalazar.

Matud pa ni PO3 Alvarado nga dihang padulong na untang mopauli si Gabaca kalit lang usab nga nibutho ang duha ka mga suspetsado ug way daghang pangutana nipusil kaniya makadaghang higayon.

Ang kapulisan naka-rekober diha sa crime og duha ka mga kabhang sa bala gikan sa wala pa matinong kalibre sa armas.