Rerouting ipatuman karong adlawa

Mopatuman na usab og traffic rerouting karong adlawa ang Cebu City Traffice Group ug ang Cebu City Traffic Operations and Management (Citom) tungod sa kalihukan nga ipahigayon nunot sa ika-130 nga anibersaryo sa adlaw’ng natawhan ni kanhi Presidente Don Sergio Osmeña Sr.

Partikular na niini ang Santos nga Misa ug ang floral offering nga anha himuon sa eskina sa mga dalan Lapulapu ug Osmeña Boulevard.

Mobalik ra hinuon ang mga sakyanan sa ilang naandang rota human sa maong kalihukan nga magsugod sa alas 7:30 karong buntag.

Apan alas 6:00 pa lang ang takna sa kabuntagon sirad-an na sa Traffic Group ug Citom ang dalan Lapulapu gikan sa Magallanes Street kutob sa dalan Legaspi.

Lakip sa dalan nga sirad-an mao ang pipila ka bahin sa Osmeña Boulevard gikan sa M.J. Cuenco Avenue kutob sa P. Burgos Street.

Subay niini ang tanang sakyanan nga gikan sa Magallanes paingon sa Plaza Independencia anha na mo-left turn sa Jakosalem Street, right turn sa P. Burgos Street ngadto na sa ilang destinasyon.

Samtang ang mga sakyanan nga gikan sa Carbon area nga moagi sa M.C. Briones paingon sa Plaza Independencia mulahos lang ug anha mo-left turn sa M.J. Cuenco Avenue paingon ngadto sa ilang padulngan.

Apan kadtong mga PUJ nga gikan sa Carbon area nga mosubay sa dalan M.C. Briones nga motuyok sa Osmeña Boulevard, anha na mo-left-turn sa dalan Jakosalem o mahimo usab nga adto na mo-left turn sa M.J. Cuenco Avenue ug mo-right turn sa Legaspi Extension ug mo-U-Turn balik sa M.J. Cuenco Avenue dayon right turn sa Legaspi Street, left turn sa P. Burgos Street, mahimo usab nga adto mo-left turn sa D. Jakosalem Street, right turn sa Osmeña Boulevard ngadto na sa ilang destinasyon.

Dugang niini, ang mga sakyanan nga gikan sa M.J. Cuenco Avenue nga mopaingon ug moagi sa Osmeña Boulevard anha na mo-right turn sa Legaspi Street, left turn sa P. Burgos Street  o  sa dalan Jakosalem ngadto na sa ilang padulngan.

Ang tanang motorista gipahimangnoan sa Traffic Group ug sa Citom nga mosunod lang sa ipakatap nga mga traffic sign sa kadalanan aron dili usab makahasol sa ubang road user atol sa pagpatuman sa temporary rerouting.