33 anyos gidunggab patay

CEBU - Patay ang usa ka 33-anyos nga factory worker human kini dunggaba sa miaging gabii sa dalan M.C. Briones sa barangay Guizo, dakbayan sa Mandaue.

Ang namatay mao si Julius Montebon, minyo, nga nagtrabaho sa usa ka furniture sa maong dakbayan apan lumad nga taga-Lotanga, Zamboanga del Sur.

Kini nailhan sa kapolisan pinaagi sa ID nga diha sa pitaka sa biktima .

Si PO1 Arthur Cuyos sa Presinto 1 sa Centro Police Station miingon nga ang biktima kuyog sa wala pa hiilhi niining mga kauban dihang gipanggukod sila sa laing grupo sa mga tawong wala hiilhi.

Gumikan sa kakusog managan sa iyang mga kauban, nabiyaan ang biktima kay nadagma kini sa karsada.

Dihang naabtan siya sa naggukod kanila, gitabangan kinig hansak sa ilang kutsilyo ug gibiyaan dihang nasuta nila nga patay na ang biktima.

Ang mga kauban sa biktima wala na usab mamalik kay nakasakay na og jeep paingon sa Consolacion.

Gikarga usab dayon sa ambulansiya ang biktima ug gidala sa Mandaue City District Hospital apan gideklarar kini sa mga doktor nga dead on arrival (DOA). - BANAT