16 anyos gipusil patay

CEBU - Namatay ang usa ka 16 anyos nga lalake dihang napusilan kini didto sa National Road, sa barangay Gansaga, lungsod sa Consolacion kagahapon sa alas 2:00 pasado sa kaadlawon.

Ang namatay mao si Jovy Dumaguete, ulitawo, nga taga Purok 4 sa barangay Nangka sa maong lungsod.

Ang nagpusil mao ang duha ka wala hiilhing lalake nga nagsakay og motorsiklo nga gituohan sa kapolisan nga sakop sa fraternity.

Si SPO2 Rizalino Aligno nga nahinabi sa Banat News miingon nga kuyog sa biktima ang laing 16-anyos nga si Gilbert Carsena nga iyang silingan sa Nangka, Consolacion.

Samtang ang duha naglakaw sa karsada pauli sa ilang panimalay, kalit lang gihunongan sila sa motorsiklo nga giluwanan sa duha ka tawo ug sa walay daghang langas, gipusil sa makatulo ka higayon ang biktima sa nag-backride sa motorsiklo.

Nasamdan sa dughan ang biktima ug dali unta kining gidala sa Eversely Child Sanitarium Hospital apan gideklarar kini sa mga doktor nga dead on arrival. - BANAT