Task force for life hulma na

CEBU - Nahulma karon ang usa ka task force nga mohashas unya sa mga kandidato sa umaabot nga 2010 elections.

Kini mao ang Task Force For Life nga gipangulohan ni Doctor Rene Josef Bullecer nga mao usab ang director sa Human Life International sa nasud.

Miingon si Bullecer nga ang tumong sa task force mao ang pag-screen ug pagmugna og guidelines sa mga kandidato nga angayang suportahan.

Kini aron sa pagsiguro nga ang mapiling mga opisyal sa nasud gikan sa presidente hangtud na sa local level, mahigugmaon sa kinabuhi.

Gani nagkanayon si Bullecer nga kung sila gikinahanglan nga mangampanya sa mga kandidato nga ilang iindusar, ila kini unyang himuon.

“We actively campaign if it will be needed kay dili ta gustong mudaog pa ning mga opisyal nga ang ilang gitan-aw ug gitinguha mao ra ang ilang personal nga interes ug dili ang kaayohan sa kinabag-an,” matud ni Bullecer.

Niadtong Sabado nagtagbo dinhi sa Sugbu ang mga national leader sa bag-o lang natukod nga task force.

Ilang gihan-ay ang tagsa-tagsa nila ka responsibilidad, alang usab sa posibleng mga lakang nga ila unyang pagahimuon.

Partikular na niini ang ilang pagpakigbatok sa mga balaudnon nga nag-ong-ong sa kongreso nga ilang gihulagway nga anti-life.

Kini ilabi na ang kontrobersiyal nga Reproductive Health Bill nga gipamugos sa mga proponent nga maaprobahan sa ubos balay balauranan.

“Kami na maoy mo-coordinate sa tanang effort all over the country alang sa mass actions ug uban pa batok sa mga anti-life bills, mas maayo nang magkahiusa ba, dunay concerted effort aron makita sa mga magbabalaud kung unsa ka lapad ang supak sa ilang gipanday nga mga balaudnon,” dugang pamahayag ni Bullecer. - BANAT