Holiday sa adlaw sa "Grand Old Man of Cebu"

CEBU - Walay klase ug walay trabaho ugmang adlawa Septiyembre 9 sa kinatibuk-ang lalawigan ug dakbayan sa Sugbu nunot sa paghandom sa ika-130 nga birth anniversary ni Don Sergio Osmeña Sr.

Kini gipasubay usab sa Akta Republika 6953 nga giaprubahan sa kongreso aron sa paghatag og higayon sa tanang mga Sugbuanon nga mahandom ang adlaw nga natawhan ni Osmeña nga gibansagang “The Grand Old Man.”

Alas 7:30 ugma sa buntag dunay ipahigayong Santos nga Misa nga ipahinungod kang Don Sergio Osmeña Sr., diha sa marker niini nga nahamutang sa eskina sa mga dalan Osmeña Boulevard ug Lapu-Lapu Street ning siyudad.

Human niini isunod gilayon ang hamubong programa ingon man ang floral offering diha sa marker nga gipaabot nga tambungan sa mga opisyal sa kagamhanan sa dakbayan ingon man sa mga kabanay ni Osmeña.

Si Don Sergio natawo niadtong Septiyembre 9, 1878 ug nakaserbisyo og kapin sa 40 ka tuig sa publiko.

Namatay si Osmeña niadtong Oktubre 19, 1961 sa edad nga 83 anyos apan kini giingong nagbilin og maayong dungog sa Sugbu.

Nagsugod si Osmeña sa iyang public service isip konsehal ug gitudlo sa American Colonial Administration isip gobernador sa Sugbu niadtong tuig 1904.

Duha ka tuig ang nakalabay si Osmeña nagpapili alang sa nahisgutang posisyon ug nidaug sa gipahigayong eleksiyon.

Dihang nahimo na nga gobernador si Osmena nagpapili usab sa labing una nga Philippine Assembly niadtong tuig 1907 ug napiling speaker sa edad nga 29.

Nagpabiling assemblyman si Osmeña hangtud niadtong tuig 1922 ug nahimong bise-presidente sa duha ka termino ubos sa Philippine Commonwealth.

Nahimong presidente si Don Sergio sa nasud ubos sa Commonwealth government dihang namatay si Presidente Manuel L. Quezon niadtong tuig 1944.

Nagpapili pagka-presidente si Osmeña niadtong 1946 apan tungod sa iyang pagkompiyansa ug sa pagdumili pagpangampanya, siya napildi ni Manuel Roxas.

Si Don Sergio nga usa usab ka abogado ug newspaper editor, maoy usa sa mga founder sa Nacionalista Party uban kang Presidente Quezon. - BANAT