Misukol sa tulisan angol

CEBU - Naangol ang taxi drayber dihang gisuklan niya ang nagbinugtong nga tulisan nga midunggab kaniya didto sa barangay Guizo, dakbayan sa Mandaue sa miaging gabii.

Ang biktima mao si Warren Pardillo, 36, minyo, nga taga Pook, Lutopan , dakbayan sa Toledo, ug nagmaneho og taxi nga may plate number PBX 881.

Si PO1 Arthur Cuyos sa Police Station 1 nga nahinabi sa Banat News miingon nga didto sa barangay Cabancalan, Mandaue City mosakay ang tulisan ug nagpahatod kini ngadto sa Mandaue Park sa barangay Guizo.

Apan pag-abot sa maong dapit, ang tulisan kalit lang milanit sa iyang kutsilyo uban ang pagtion niini sa liog sa biktima ug mipahibawo nga tulis.

Matud pa ni Cuyos nga gipugngan sa biktima ang bukton sa tulisan ug didto nagdinumogay sila sulod sa taxi.

Tan-aw sa drayber nga di man gyud niya malupig ang tulisan, migawas siya sa taxi ug mikaratel siya’g dagan.

Ang tulisan usab nga nakaamgo nga nag-inusara nalang siya, mikabad usab og dagan palayo sa taxi nga walay nadalang kuwarta.

Pagtan-aw sa biktima nga misutoy na ang tulisan, gibalikan niya ang iyang sakyanan ug iyang gisundag padagan ang tulisan kinsa niadtong tungora misakay dayon og multicab nga pasaheroan paingon sa Liloan.

Midiretso ang biktima ngadto sa kapolisan sa Presinto 3 sa Basak Police Station , apan bisan   pa sa blocking force nga gihimo sa mga otoridad, wa na gyud hiapsi ang tulisan.

Hinuon pagtan-aw sa biktima nga bukton ra niya maoy gitaupan sa kutsilyo ug layo ra sa tinai, midangop lang dayon siya sa hospital ug nagpatambal sa iyang samad. – BANAT